ХҮРЭЭМАРАЛ СУМЫН ХӨГЖИЛ ДЭВШЛИЙН ТӨЛӨӨ ХАМТДАА

         Баянхонгор аймаг, Хүрээмарал сумын цахим хуудсыг сонгон зочилж байгаа таны энэ өдрийн амар амгаланг айлтган мэндчилье. Цахим хуудсанд хандсанаар та  орон нутгийн холбогдох байгууллагуудын талаар болон төрийн үйлчилгээ, хууль тогтоомж, шийдвэр, цаг үеийн асуудлаар олон талт мэдээллийг хугацаа алдалгүй хүлээн авах боломжтой бөгөөд аймгийн Засаг даргын Тамгын газарт хандан цахим хэлбэрээр санал хүсэлтээ илэрхийлэх боломжоор хангагдана гэдэгт итгэлтэй байна.  

          Бидний өвөг дээдэс үеийн үед сайн ажиллаж, сайхан амьдарч өөрийн нутаг усныхаа нэр төрийг өндөрт өргөсөөр ирсэн түүхтэй. Дэлгэр өлгий нутаг, тэгш сайхан байгаль, онгон тагшин уул ус, унасан газар шороогоо унаган төрхөөр нь нандигнан хадгалж цэвэр ариунаар нь хайрлан хамгаалж, бидний үед өвлүүлж ирсэн ухаантай, буянтай хүмүүсээ.

Бид бүхэн төрсөн нутагаа хөгжүүлж, иргэдийнхээ таатай орчныг бүрдүүлж, ирээдүй хойч үеийнхээ өмнө хүлээсэн үүрэг хариуцлагаа ухамсарлан, эв эеийг эрхэмлэн, нэг үзүүрт сэтгэлээр хамтран ажиллах нь Төр иргэдийн холбоо болсон нутгийн удирдлагын байгууллага төдийгүй Марал нутгаар овоглосон хүмүүн бидний ариун үүрэг билээ.

            Хүрээмарал сум нь Түүх соёлын өвөрмөц тогтоц бүхий байгальтай, давс хужрын орд, ашигт малтмалын нөөцтэй, мал аж ахуйг эрчимжүүлэн, аялал жуулчлал хөгжүүлэх давуу талуудтайн дээр түүхэн хөгжлийн ололт, амжилт алдаа оноог дэнсэлж, одоо цагийн боломж бүхнийг ашиглан, ирээдүйн бүтээн байгуулалтыг зөв төлөвлөх нь маш чухал асуудал болоод байна.           

          Үүнийг гүнээ ухамсарлан “Хүрээмаралчууд бид байгаль дэлхий, уламжлалт түүх соёл, ёс заншлаа дээдлэн, хүний хөгжлийг хангасан, дэд бүтэц, жижиг дунд үйлдвэрлэл, аялал жуучлал, эрчимжсэн мал аж ахуй, газар тариалан хөгжүүлсэн эдийн засгийн чадавхи бүхий жишиг сум болно” гэсэн эрхэм зорилго алсын хараагаа болгосон сумын эдийн засгийн хөгжлийн стратеги төлөвлөгөө, түүнд дэвшүүлсэн зорилго, зорилтууд, төсөл, хөтөлбөрүүдийг ажил хэрэг болгон сумынхаа хөгжил өөрчлөлт авчрах үйлсэд дан ганц төр захиргааны байгууллага бус манай бүтээлч хөдөлмөрч иргэд, нутгийн уугуул иргэд, сумаас төрсөн эрдэмтэн мэргэд, төрийн бус байгууллага, бизнес эрхлэгчид та бүхнийг гар бие чин сэтгэлээ зориулж хөдөлмөрлөн гэдэгт итгэлтгэй байна.

              Сумын Засаг даргын эрхэм хүндтэй, бас хариуцлагатай албанд томилогдсон миний бие албан үүргээ чин шударгаар биелүүлж айл өрх, иргэн бүрт шууд тусахаар ашиг орлогыг нь нэмэгдүүлэх, аймгийнхаа нийгэм эдийн засгийг дээшлүүлэхийн төлөө бие сэтгэл, мэдлэг чадвар, хичээл зүтгэлээ бүрэн дайчилж ажиллах болно.

            Та бүхний маань юу санасан есөн цагаан хүсэл тань сэтгэлчилэн бүтэж, эрүүл энх явахын өлзийтэй ерөөлийг өргөн дэвшүүлье.  

            Төрөлх сумын маань хүн ард нь амгалан тайван амьдарч, ажил үйлс өөдрөг байж, нутаг ус маань цэцэглэн хөгжих болтугай. 

 

Буурал дээдсийн цог хийморь өнөд биднийг түшиж явах болтугай!

 

Хүрээмарал сумын Засаг дарга 

Сандагийн Сумъяабазар